مع سحورهـ تحلـى الفـزوورهـ

سحرالعيون · 2 رمضان 1431هـ, 06:20 صباحاً

السـلام عليكم ورحمة الله وبركاته

كل سنه وانتم بخير ياعيالي والله لايرد لكم دعوه بهالشهر الا مستجابه قولو امين
وجعل ربي يرزقنا المطر ويغيثنا ويرزقنا السيل مقرقع البيبان

هذا توني مخلصه صلاة تروايح وفاضيتن لكم وعسا الله يتقبل منا ومنكم صالح الأعمال عساكم صليتوووها جعل ربي يبارك فيكم ؟

من اللي بدا يقرا قراءن ترا لازم تختموون والكسبان هو يختم بالشهر كم مره ..

وش مسوين انتم في بنيتي تجلس لكم بالليل والنهار مير الله يستر غارفين عقلها وقلبها غرف هههه

نبدا بسم الله الرحمن الرحيم

انا بسوولف عليكم همن بعدين ابعطيكم سوال او سوالين سهل وبسيطن مره واللي بيقرا سويليفاتي بيعرف حله وجوابه

عيشتنا قبل في رمضان ياطويلين العمر مهنا احسن منها بساطه وسعة صدر وفلة حجاج

يومنا يبدا من عقب الظهر

نقوم انا ووخياتي والا حنا نروح نحوس وندووس مع امي جعلها بالجنه ونساعدها
ونعجن القيمات وننظف البيت ونكنسه بمكنسة الخووص و ارضنا كانت بس اسمنت ونرشه بمويه عشان يبرد المكان علينا ونفرش الزوليه عاد قبل فينا شده لكل شي
ماهوب الحين يابنات هالوقت مايمديكم تصلحون شي الا تتوجعون ياحيل الله

نتحرى للأمام متى بس يمسك اذنه ويأذن ونفطر ..

وهالله هالله يأذن ونفطر يالله من فضلك
ونحط القيمات فوقها السكر والقهيوه المره والرطب والتوت والعصيده
ووخياني يروحون مع ابيي جعله بجنات النعيم يصلون المغرب
وبعد الصلاة نروح نتراااكض عشان نسمع الرادو لأم حديجان
ماعندنا هالتلفزيونات همن نصلي العشا واروح انا واخياتي مع جدتي الله يرحمـها نصلي التراويح وبعد مانخلص نجي
نشرب الشوربه مع الخبيزات ونشرب ذاك الشويهي يامحلا طعمته تطير بالراس بذاك البرييق القديم الأخضر ..
وماتجي الساعه 10 والا 11 بالليل الا كلن مطحطح وراقد بمرقده على هذيك المطارح والدواشق بالسطح ..

وبكذا خلصت سويلفتي وعاد كلككم بناتي وعيالي واللي بيجاوب على سوالي له دعوه من كتاوة واقصى قليبي

السؤال

وشهو الشي اللي يعتبر مهم ووصى عليه نبينا جعلنا محشورين بالجنه معه اللي ماذكرته بسويلفتي !!

انا ذكرت بهالسالفه بريق اخضر قديم من منكم عرفه يجيب لي صورته !!

وصلى الله على النبي والله يحفظكم جميع ويخليكم لعين ترجيكم ويطرح فيكم البركه والصلاح ويجعل منكم هداة مهتدين ياكريم واعتبروني مقام امكم اي شي أسالوني لحدن يستحي ابد ..

تحرو لي بالفزوره الثانيه بعد كم يوم ان ربي احيانا ..

مي مي · 2 رمضان 1431هـ, 06:59 صباحاً

ياحي الله خالتنا سحوره ..
سالفتك ذكرتنا بأيامكم الحلوه
مو مثل هـ الزمن الغريب والعجيب ..

الله يعطيك الصحة والعافية

وشهو الشي اللي يعتبر مهم ووصى عليه نبينا جعلنا محشورين
بالجنه معه اللي ماذكرته بسويلفتي !!

السحور

انا ذكرت بهالسالفه بريق اخضر قديم من منكم
عرفه يجيب لي صورته

محمد فهد الراشد · 2 رمضان 1431هـ, 07:07 صباحاً

وشهو الشي اللي يعتبر مهم ووصى عليه نبينا جعلنا محشورين
بالجنه معه اللي ماذكرته بسويلفتي !!

النيه ياخاله سحوره

والابريق الاخضر زي الي حاطتها مي مي

قايد الريم · 2 رمضان 1431هـ, 07:13 صباحاً

يا هلا وغلا بخالتي سحوره الشهر عليتس مبارك وان شالله
تعودينه السنه وكل سنه بكل صحه وعافيه

ما شالله عليتس يا خاله ذكرتي كل شي من صلاه وفطور وتراويح وتخمدون الساعه 11
واعتقد الي ما ذكرتيه النيه وسحور

والابريق نفس الصوره الي حاطته مي مي

الغصن الحزين · 2 رمضان 1431هـ, 07:30 صباحاً

ياهلا بك سحوره
طرح رائع جدا
وفوزير روعه
الاخوان اعقد جوابوا

رسالة إدارية:
زائرنا الكريم هذه الرسالة تفيد انك غير مسجل لدينا في مملكة الفن الشعبي نأمل منك التسجيل لكي تتمتع بجميع خصائص المملكة. للتسجيل في مملكة الفن الشعبي اضغط هــنا.

مع سحورهـ تحلـى الفـزوورهـ

مسابقات المملكة الرمضانية