جميع المرثيات في الفنان عيسى الاحسائي

ابوك يانايف توفى وانا ابوك=من عقب ابوك وعادت الحـُر يوفي
ابخدمك كني معك عبد مملوك=ايضأ واشيلك شيل فوق الكتوفي
واللي يقولوا لك سلى لايغروك=النار شبت وسط قلبي وجوفي
ان عشت والله ما الخلايق يضروك=ويشهد علي فيما كتبته بحروفي
واحذر من اصحاب الردى لايمروك=وياليت شوفك دايمن عند شوفي
لا قالوا ابطى ياولد لايغـــــــــــروك=ومن عقب عيسى ياتعاسة ظروفي

ابكتب من الشعر لين الناس تسمعني=عيسى توفى وعفت الشعر والوانه
موته جرحنــــــــــي وآلمنــي وروعني=ماينبني فن مهدومه حدى اركــــــانه
صديق خلا لي الدنيا وودعــــــــــني=اقفى وخلالي اشعاري مع الحــــانه
جمهور ابو نايف اتعذب وعذبــــــني=كلن يجيني يبـــــــــي اخبار فنانه
من كل ديره علــــــى الهاتف يكلمني=وذاك يرســـــــل مكاتيبه وعنوانه
واللي يجيــــــــني بأستغراب يسألني=هل صــــــــح قلت البقاء لله سبحانه
دمعي كما الســـــيل ليت الدمع ينفعني=ما عندي اعصاب اشوف اهله وورعانه
صديقي الي على المعنى وما يعنــــــي=ما هو من اللي يبيـــــــع اعهود صدقانه
اثر على حال ابو ميســــون واوجعني =نويت اخلي جميع الشعر واوزانه
ياليت جمهور ابو نايـــف يصدقني=ان القوافي بدونه مالها خـــــانه
لكن طوارئ ظروف تدفــــعني وتجبرني=ممكن ويمكن على شانه ومن شانه
ياليت والليت لاتسمن ولاتغنـــــي=كثر المصايــــــب تحزن روح وجعانه
ياليتني ماعرفت اسمه ويعرفني=ولاسهرنا ومعــــنا اعيون سهرانه
جلاس كلن ينادي يافتى اطربنـــــي=في مجتمع ينخلط حضره وبدوانه
ما كن هذا الشخص يعزف ويغني=لو هو يحب المظاهر كان بأمكانه

ياهل الحساء وين الذي يطرب الناس=وين الطرب والفن وايام عيسى
كلمة معا نغمة وعود(ن) ومــــــــــــرواس =ياحيلة الله ياجماهير عيــــــــسى
خلا غصون القلب صرعا ويٌبــــــــاس=كلن نشدني ياعلي وين عيســـــى ؟!!
واهل الطرب غيره على العين والـــــرأس=مشكور ياللي مايبي غيـــــر عيسى
مشكور لاتامن مع البيت جــــــــــلاس=كلن يبـــــي صوره مع اطفال عيسى
ويذكروهم كل بكره ومقـــــــــــلاس=ويهلو العــــــــبرات من شأن عيسى

ذكرى الصديق الي بشعري تغنا=وانا بصوته همت بكل وادي
لاوتار خيمتنا وعـــــــــوده سكنا=وغنت معانا الحاضره والبوادي
والله فلا اذكر فيه يوم اختلفــــنا=ولاحبينا حال ينقص وزادي
ياما تحملـــــــنا ويامــــا صبرنا=ولافرقونا المحرشين الاعادي
وغبنا عن الساحه وقلنا وقفنا=وتناولـــــــــونا بالقلم والمدادي
نصبر على تجريحهم من شرفنا=وزدنا لهم بالصبر وزادوا تمادي
شفت العواذل ماتقدر حزنَا=وقمت امتطي للحرب صهوة جوادي
يشبوا النار لما قعـــــــــــدنا =ولما وقفنا تصبـــــــــح النار رمادي

لو البكاء ينفع وكُـثر الحسايف =لاابكيك يا عيسى على طول الايام
واصيح واتحسف وأهلْ الذرايف=حتى يدب الذُعر بقلوب الايتام
الفن بعدك قلت له ياخلايف=والشعر مزقته وكسّرت الاقلام
لكن هالدنيا على طبع زايف=كم رفـَعت واطي وكم وطـَت إعظام
وشاورت قلبي قلت ويش انت شايف ؟=اوقف هنا ولا أسلك الدرب قدام
وقررت اشيل العود واعطيه نايف=لعل فنك يكسبه فن وإلهام
بشير قبلك كان بالفن كايف=وانتا رفعت الفن من بعده اعوام
ويكفيك ذا يسمع وهذاك شايف=كم قلدوكم في مواويل وانغام

ويلاه واهمي وزود احزاني = ليت الليالي دامتك يافتى الشرقيه
عوضني الله بعد ابوي ابوي الثاني = لازالت اصحاب الوفاء والضماير حيه
جيته من الدمام قاصد مسير عاني = وهو يجني مثل عيسى وعيسى زيه
يطلب لي التوفيق والخير انا واخواني = يالله توفق كل مخلص صدوق النيه
بمشي بتوجيهه ورب السماء يرعاني = يارب تجعل كل طلبه لنا مقضيه
شكراً لمن قدر شعوري ومن واساني = من عقب ابوي الراحل اللي بليا جيه
من عاش مات وكل حي(ن) عليها فاني = والنفس مأموره .. لخلاقها منهيه

رسالة لعيسى صمتها يذهل الأوراق = عليها غبار سنين بٌعده وغيباته
من الوادي الأخضر وجمهوره المشتاق = لعيسى وفنه ما انطفت نار لوعاته
ومن شاعر الوادي لفنانه العملاق = إلا خير من غنَا ومن لحن أبياته
غفر ذنب عيسى واعتقه والي الإعتاق = وعمه بعفوه واسكنه روض جناته
شرب وارتوى من نهرها الصافي الدفاق = عفى الله عن عيسى ذنوبه وسياته
نعم يازعيم الفن يالشادي الذواق = بكينا لموتك والمخاليق مواته
تركت الطرب وإنته على عرشه السباق = تركته وهو بأعظم شموخه وروعاته
ولازال فنك والجماهير والعشاق = على عهدك السابق وفي المستوى ذاته
من اللي شدا مثلك وغنَا من الاعماق = وعبَر عن أحزانه وفرحه وحسراته
فراقك سبب حزني وجرحي على الإطلاق = ولايشكي إلامن هو أبخص بعلاته
تحملت من شانك جفا ناس ماينطاق = ولو هو لغيرك ماتحملت زلاته
ولي طبع ما أجاوب على ناقص الأخلاق = على شأن يصلى نار قهره وحراته
وانا طالب الله منشي الرعد والبراق = اله(ن) على خير البشر نزل آياته
يضاعف لعيسى بن علي رحمة(ن) وإشفاق = ويِدْخله في جنات عدنٍ بمرضاته
الآ واهني اللي من مد واجزل عطا وانفاق = وكبَر واقام الفرض وأداه بأوقاته
وزكَى وحج البيت وأفواجها تنساق = بحر من بشر تزدان مكة بموجاته
وطهر ضميره وأودع الخلق للخلاق = تندم على وقت(ن) بسِن الجهل فاته
يطول اللقاء بالاصدقاء وانتهى بفراق = ولايعلم المخلوق يومه وساعاته